Лепшыя рок-альбомы і хіты кастрычніка 2024
Прывітанне, сябры!
Лепшым альбомам кастрычніка можна смела назваць 11-ую студыйную працу каліфарнійскіх панк-рок легенд The Offspring - Supercharged. Гурт гучыць свежа і бадзёра, як быццам музыкам яшчэ далёка да пенсійнага ўзросту. Па стылі кружэлка не прапануе каардынальных паваротаў, а ідэальна ўпісваецца ў звыклае гучанне гурта часоў яго лепшых альбомаў. Некаторыя песні месцамі нават паўтараюць знаёмыя рыфы і хады.
Лідар калектыву Дэкстэр Холанд пацвердзіў, што падыход да напісання песень быў даволі прамалінейны. На мой густ, у гэтым няма нічога дрэннага - каму перашкодзіць яшчэ адзін добры альбом класічнага панк-рока?
Яшчэ адна навінка, якую ніяк нельга абмінуць – першая беларускамоўная кружэлка беларускага калектыву Петля Пристрастия – Суперпазіцыя.
«У пэўны момант у маім жыцці з'явілася шмат людзей, якія размаўляюць па-беларуску ў паўсядзённым жыцці. А калі з табой размаўляюць на мове, якую ты хоць як-небудзь разумееш, вельмі цікава адказваць на ёй жа, у меру сваіх магчымасцяў. У выніку ты пачынаеш адчуваць яе мелодыку, і ў цэлым стаўленне да мовы змяняецца. А пасля з’яўляецца жаданне зрабіць тое, чаго ты яшчэ не рабіў: прыдумаць поп-музыку на беларускай мове. Ты робіш адну песню, потым з’яўляюцца людзі, гатовыя табе ў гэтым дапамагчы, і вось з'яўляецца альбом. Гэта даніна павагі да мовы, якая незаслужана доўгі час была аб'ектам пагарды. Для нас гэта эксперымент, і прыемна, што гэта эксперымент менавіта з беларускай мовай. Тэмы звычайныя: вера, надзея, любоў, расцярушаныя па патэльні дэпрэсіі», - распавёў фронтмэн калектыву Ілля Чарапко-Самахвалаў.
Ну і яшчэ дзве добрыя навінкі кастрычніка:
Mother of Millions - Magna Mater
Myles Kennedy - The Art of Letting Go